Тро́ичны. По 1-м стихосло́вии седа́льны умили́тельныя осмогла́сника.

По 2-м же стихосло́вии глаго́лем настоя́щий седа́лен, гла́с 8.

Подо́бен: Непоколеби́мое утвержде́ние:

Воздержа́нием просвети́вше ду́шы на́шя, Кресту́ поклони́мся спаси́тельному, на не́мже Христо́с пригвозди́ся, и возопии́м ему́: ра́дуйся, постя́щихся сла́досте, и изве́стная по́моще. Ра́дуйся губи́телю страсте́й, бесо́м сопротивобо́рче. Ра́дуйся Дре́во блаже́нное.

Богоро́дичен. Подо́бен:

Непоколеби́мое утвержде́ние ве́ры, и честно́е дарова́ние ду́ш на́ших, Богоро́дицу в пе́снех велича́ем ве́рнии: ра́дуйся, ка́мень жи́зни во чре́ве Твое́м вмести́вшая. Ра́дуйся конце́в упова́ние, оскорбля́емых засту́пница. Ра́дуйся, Неве́сто Неневе́стная.

По 3-м же стихосло́вии седа́лен, гла́с то́йже:

Подо́бен: Я́ко нача́тки:

Я́коже жи́знь тва́ри, Тво́й Кре́ст предлежа́щий вселе́нная целу́ет, Го́споди, и покланя́ющися зове́т Ти́: того́ де́йством в ми́ре глубо́це пою́щыя, и воспева́ющыя Тя́ воздержа́нием соблюди́, Многоми́лостиве.

Богоро́дичен, гла́с то́йже: Ра́дуйся, а́нгелом ра́дость ми́ра прии́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшая бы́ти Ма́ти Бо́жия.

Кано́н Мине́и и настоя́щий трипе́снец, господи́на Ио́сифа.

И стихосло́вится пе́снь. Гла́с 8.

Пе́снь 2.

Ирмо́с: Ви́дите ви́дите, я́ко А́з е́смь Бо́г, дре́вле Изра́иля сквозе́ Чермно́е мо́ре проведы́й, и пита́вый, и спасы́й, и от го́рькия рабо́ты свободи́вый фарао́новы.

Среде́ тва́ри претерпе́л еси́ Кре́ст, Месси́а Сло́ве Бо́жий: ему́же поста́ дне́сь преполове́нием ве́рно покланя́емся, прося́ще ви́дети и Воскре́сние Твое́.

Жезло́м си́лы, проображе́нным Моисе́ю, мо́ре страсте́й пресека́юще, дости́гнем к земли́ обетова́ния, и ма́нны мы́сленныя насы́тимся бога́тно.

Кто́ не возрыда́ет тя́? кто́ не воспла́чет тя́ душе́, жела́ющую лука́вая, и не взыска́ющую любо́вию благи́х, пра́веднаго Судию́ презира́ющую при́сно, долготерпя́щаго на тебе́?

Богоро́дичен: Пло́ть бы́вша непреме́нно, Христа́ Де́во ражда́еши: его́же приле́жно моли́, плотски́х страсте́й измени́ти покланя́ющыяся Кресту́, его́же пло́тию претерпе́.

И́ный, гла́с то́йже.

Ирмо́с: Ви́дите:

Ви́дите ви́дите, я́ко А́з е́смь Бо́г, вселе́нней Кре́ст Мо́й подая́й ору́жие спасе́ния, во е́же ны́не поклони́тися ему́: я́ко да целу́ющии его́ упражня́ют вра́жия кова́рства.

Ве́лий еси́ Го́споди, многоми́лостивый, я́ко да́л еси́ животворя́щему Твоему́ поклони́тися ны́не Кресту́, иде́же ру́це Твои́ и но́зе пригвозди́шася, на не́мже кро́вь излия́ся пречи́стаго Твоего́ ребра́, жи́знь источи́ на́м.

Тро́ичен: Пресоверше́нная Еди́нице, Пребоже́ственная, триипоста́сная, нерожде́нне О́тче, и Сы́не единоро́дне, Ду́ше от Отца́ исходя́й, Сы́ном же явля́яйся, Существо́ еди́но и Естество́, Госпо́дство, Ца́рство, спаси́ все́х на́с.

Богоро́дичен: Неизглаго́ланное чу́до Твоего́ Рождества́ Ма́ти Де́во: ка́ко бо и ражда́еши, и чиста́ еси́ в то́мже? ка́ко Отроча́ ражда́еши, и не ве́си иску́са му́жеска отню́д? Я́коже ве́сть па́че естества́, от Мене́ новоле́пно Сло́во Бо́жие ро́ждшееся.

Сла́ва Тебе́ Бо́же на́ш, сла́ва Тебе́.

Тя́ Моисе́й вели́кий прообразова́ Кре́сте на́м, ру́це распросте́р, и победи́в Амали́ка. Тя́ изъобража́юще в се́нех и возду́се, отвраща́ем и побежда́ем началозло́бнаго врага́, песносло́вяще Христа́.

Ирмо́с: Ви́дите ви́дите, я́ко А́з е́смь Бо́г ва́ш, пре́жде ве́к рожде́нный от Отца́, и от Де́вы в после́дняя без му́жа заче́ншийся, и разруши́вый гре́х пра́отца Ада́ма, я́ко Человеколю́бец.

Пе́снь 8.

Ирмо́с: Покрыва́яй вода́ми:

Соста́вивый основа́ния всея́ земли́, я́ко Бо́г возне́сся на Дре́во, недви́жимое все́м дарова́л еси́ ве́рным утвержде́ние Го́споди, спаси́тельное ору́жие Креста́ Твоего́: ему́же покланя́ющеся, Тя́ превозно́сим во вся́ ве́ки.

Облиста́емо зря́ще, па́че со́лнечныя зари́, Кре́стное дре́во, прииди́те посто́м облиста́еми, ны́не облобыза́им, почерпа́юще благода́ть светоно́сную, и тьму́ отгоня́ющую от превознося́щих Христа́ во ве́ки.

Вода́ жива́я неизме́нная, в ве́чную жи́знь, Ты́ су́щи Сло́ве, кро́вь и во́ду от ре́бр на Кресте́ источи́л еси́ Влады́ко, грехо́вныя пото́ки изсуша́я. Те́мже молю́ Тя: изсуши́ страсте́й мои́х лука́вная истица́ния.

Богоро́дичен: Я́ко освяще́ние у́мное, во святы́х Бо́га почива́ющаго ражда́еши, свята́я Богома́ти Чи́стая, вся́ концы́ освяща́ющаго, боже́ственным поклоне́нием дне́сь Де́во Дре́ва пресвята́го, на не́мже пло́тию пригвозди́ся.

И́ный. Ирмо́с: А́нгели и небеса́:

Прииди́те ви́дим лю́дие, живоно́сное Дре́во ны́не предлежа́щее, на не́мже пло́тию Христо́с водрузи́ся Бо́г на́ш, и со стра́хом пою́ще, сему́ покланя́емся во вся́ ве́ки.

Трисло́жный Кре́ст, я́ко Тро́ичный о́браз воспева́ем, и покланя́ющеся со стра́хом возопии́м, благословя́ще, пою́ще и превознося́ще Христа́ во ве́ки.

Благослови́м Отца́, и Сы́на, и Свята́го Ду́ха, Го́спода.

Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная, и обое́ Све́т, Бо́га, три́ сла́влю во ве́ки.

Богоро́дичен: Еди́на нетле́нно ражда́еши, еди́на дои́ши Младе́нца без бра́ка, еди́на Созда́теля Твоего́ ражда́еши и Влады́ку, а́ще и Ма́ти и Раба́: Тя́ Ма́ти Де́во, пое́м во ве́ки.

Сла́ва Тебе́ Бо́же на́ш, сла́ва Тебе́.

Слепа́го от рождества́ воочи́л еси́ сло́вом, ослепле́нныя мои́ серде́чныя о́чи па́ки отве́рзи, да узрю́ све́т повеле́ний Твои́х Христе́ во ве́ки.

Хва́лим, благослови́м, покланя́емся Го́сподеви:

Ирмо́с: А́нгели и небеса́ на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте и превозноси́те Его́ во ве́ки.

Пе́снь 9.

Ирмо́с: Благослове́н Госпо́дь Бо́г:

Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ на́м дарова́вый держа́ву, и прибе́жище и тве́рдое основа́ние, и́мже враги́ на́шя ны́не рога́ми избоде́м.

Я́ко плени́цами стя́гнут е́смь, безме́рными зло́бами, и стези́ Твоя́ спаси́тельныя Христе́, во́лею разуме́ти не хощу́: Твои́м мя́ обрати́ Кресто́м, омраче́ние мое́ разреша́я, за неизрече́нную ми́лость благоутро́бия Твоего́.

Фарисе́ево возноше́ние подража́в зле́, низведо́хся паде́нием лю́тым и боле́зненным, и лежу́ враго́м в попра́ние: но уще́дри и спаси́ мя Христе́, щедро́т ра́ди смири́вый Себе́ вы́шний Царю́ сла́вы.

Богоро́дичен: Ро́дове Тя́ вси́ блажа́т, Чи́стая: Иису́с бо еди́н рожде́йся от Твоея́ утро́бы, То́й я́ко ве́сть, сотвори́ Отрокови́це Де́во, с Тобо́ю вели́чия: Его́же моли́ спасти́ся ста́ду, и лю́дем Твои́м.

И́ный.

Ирмо́с то́йже.

Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ предложи́вый на́м в поклоне́ние. того́ целу́юще ве́рно, того́ и воспева́юще, Твою́ вели́кую ми́лость пое́м непреста́нно.

Це́ркви похвала́ ты́ еси́ честны́й Кре́сте, царе́й ору́жие и ми́ру всему́ ми́ра по́честь богоде́ланная, Кре́сте, правосла́вных ра́досте, вселе́нныя храни́телю, сохрани́, освяти́ тебе́ покланя́ющыяся.

Сла́ва: Тро́ице свята́я, сла́ва Тебе́, единоче́стная Еди́нице, Боже́ственное Естество́, еди́но Ца́рство стра́шное, О́тче, Сы́не, со Ду́хом, све́те непристу́пный все́м, безнача́льное Божество́, спаси́ служа́щыя Тебе́, все́х Созда́телю.

Богоро́дичен: У Креста́ я́ко стоя́ше А́гница Твоя́ Иису́се, Па́стыря и Влады́ку Своего́ зря́щи, го́рько рыда́ше, и утро́бу дви́жущи о Тебе́ Христе́ взыва́ше: что́ стра́нное виде́ние? Жи́зне, ка́ко умира́еши?

Сла́ва Тебе́ Бо́же на́ш, сла́ва Тебе́.

Манасси́ю я́ко спа́сл еси́ пока́явшася Бо́же, спаси́ и мене́, слеза́ми ка́ющася го́рце, и не отврати́ раба́ Твоего́: уклони́х бо мою́ ду́шу, я́ко дре́вле Изра́иль о́ный, вся́ дни́ моя́ живы́й в блуде́.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́дове о́трока Своего́: в ни́хже посети́ на́с Восто́к с высоты́, и напра́вил ны́ е́сть на пу́ть ми́ра.

Свети́лен гла́са.

На стихо́вне самогла́сен дне́, два́жды, гла́с 8:

Велехва́льнаго фарисе́а, от возноше́ния помышля́ющи душе́ моя́ осужде́ние, и смиренному́драго мытаря́ испове́данием прегреше́ний позна́вши оправда́ние, о́ваго у́бо отложи́ти потщи́ся о доброде́тели дерзнове́ние: о́ваго же прия́ти, я́же согреши́ла еси́, испове́дание. воздви́гнися несмири́тельную себе́ припложа́ющи, меростра́стием высоту́, от Христа́ иму́щаго ве́лию ми́лость.

Му́ченичен: Вельми́ подвиза́стеся святи́и, му́ки от беззако́нных претерпе́вше до́блественно, Христа́ испове́дающе пред царьми́: и па́ки преста́вившеся от жития́, си́лы де́йствуете в ми́ре, и неду́жныя от страсте́й и́х исцеля́ете святи́и, моли́те спасти́ся душа́м на́шым.

Сла́ва, и ны́не, Богоро́дичен, гла́с то́йже: Кро́в Тво́й Богоро́дице Де́во, врачевство́ е́сть духо́вное: во́нь бо прибега́юще, душе́вных боле́зней избавля́емся.

На 6-м часе́ тропа́рь проро́чества, гла́с 6:

Кресту́ Твоему́ покланя́емся Влады́ко, и свято́е Воскре́сние Твое́ сла́вим.

Проки́мен, псало́м 65, гла́с 6: Благослове́н Бо́г, И́же не отста́ви моли́тву мою́, и ми́лость Свою́ от Мене́. Сти́х: Благослови́те язы́цы Бо́га на́шего.

Проро́чества Иса́иина чте́ние. [Ис. 25:1–9.]

Го́споди бо́же мо́й, просла́влю Тя́, воспою́ и́мя Твое́, я́ко сотвори́л еси́ чу́дная дела́, сове́т дре́вний и́стинный: да бу́дет, Го́споди. Я́ко положи́л еси́ гра́ды в пе́рсть, гра́ды тве́рдыя, е́же па́сти основа́ниям и́х, нечести́вых гра́д да не сози́ждется в ве́к. Сего́ ра́ди благословя́т Тя́ лю́дие ни́щии, и гра́ди челове́ков оби́димых возблагословя́т Тя́. Бы́л бо еси́ вся́кому гра́ду смире́нному помо́щник, и изнемога́ющым за оскуде́ние покро́в, от челове́к злы́х изба́виши и́х: покро́в жа́ждущих, и ду́х челове́ков оби́димых. А́ки челове́цы малоду́шнии жа́ждущии в Сио́не, я́ко изба́виши и́х от челове́к нечести́вых, и́мже на́с пре́дал еси́. И сотвори́т Госпо́дь Савао́ф все́м язы́ком: на горе́ се́й испию́т ра́дость, испию́т вино́. Пома́жутся ми́ром на горе́ се́й: преда́ждь сия́ вся́ язы́ком: то́й бо сове́т на вся́ язы́ки. Пожре́ сме́рть возмо́гши, и па́ки отя́т Госпо́дь Бо́г вся́кую сле́зу от вся́каго лица́: поноше́ние люде́й отя́т от всея́ земли́, уста́ бо Госпо́дня глаго́лаша [сия́]. И реку́т в де́нь о́ный: се́ Бо́г на́ш, На́ньже упова́хом, и спасе́т на́с: Се́й Госпо́дь, потерпе́хом Его́, и возра́довахомся, и возвесели́хомся о спасе́нии на́шем.

Проки́мен, псало́м 66, гла́с 6: Благослови́ ны Бо́же, Бо́же на́ш, благослови́ ны Бо́же. Сти́х: Бо́же, уще́дри ны́ и благослови́ ны.

На Го́споди воззва́х, поста́вим стихо́в 6, и пое́м стихи́ры подо́бны Трио́ди. Гла́с 6:

Подо́бен: Всю́ отложи́вше:

Посреде́ земли́ претерпе́л еси́ Кре́ст и стра́сть Ще́дре, все́м безстра́стие и избавле́ние подая́, преполове́нием дне́сь посто́в: сего́ ра́ди вси́ в поклоне́ние того́ предлага́ем, и ра́достно облобыза́ем, ви́дети Твоя́ стра́сти, и живоно́сное Воскре́сние, просвеще́ни боже́ственными доброде́тельми, Сло́ве Бо́жий, да сподо́бимся вси́, еди́не Многоми́лостиве.

Подо́бен:

Ме́ртв бы́л еси́ на Кресте́ просте́рт, и копие́м прободе́н, и же́лчию долготерпели́ве напая́емь, Ме́ррския во́ды Влады́ко, руко́ю Моисе́овою в сла́дость преложи́вый. Те́мже молю́ся Тебе́ и прошу́: стра́сти горча́йшыя от мы́сли моея́ отжени́, и покая́ния ме́дом у́м мо́й услади́в, покло́нника мя́ покажи́ честны́я стра́сти Твоея́.

И́на, гла́с 1.

Подо́бен: Дре́вле Моисе́ю:

Его́же дре́вле Моисе́й прообра́ж дла́ньма свои́ма, побежда́ше Амали́ка, вели́кий Кре́ст дне́сь, пред очи́ма на́шима зря́ще лю́дие предлежи́мый стра́шно, прико́снемся чистото́ю, умо́м же и устна́ма: на не́м бо Христо́с вознесе́ся умертви́вый сме́рть. И таковы́я благода́ти вси́ сподо́бившеся, пе́сньми Богодухнове́нными все́х Спа́са песносло́вяще, мо́лимся дости́гнути и са́мое спаси́тельное Воскре́сние.

И́ны стихи́ры подо́бны. Гла́с 4.

Подо́бен: Да́л еси́ зна́мение:

Прииди́те поклони́мся жи́зни на́шея хода́таю, явле́нному дре́ву дне́сь, Христа́ Бо́га на́шего Кресту́, и́мже сме́рть уязви́ся, и воскре́сние на́м па́дшым обнови́ся я́ве, изба́вившему зову́ще: на́с ра́ди во́лею пострада́вый, да спасе́ши вся́ческая, Бо́же на́ш, сла́ва Тебе́.

Держа́ва необори́мая христиа́ном на́м даде́ся Кре́ст Тво́й Спа́се на́ш, и́мже иноплеме́нных язы́ков побежда́ются мно́жества, и ми́р Це́ркви Твое́й Христе́ осеня́ет, правосла́вящей до́бре. Его́же ны́не целу́юще, Тебе́ те́пле взыва́ем: ча́сти сподо́би и на́с святы́х Твои́х.

Слеза́ми очи́стивше душе́вная чу́вства, и посто́м очи́стившеся, прииди́те поклони́мся Кре́стному дре́ву, и́мже упраждня́ются душетле́нныя пло́ти воздержа́нием взыгра́ния, распе́ншемуся зову́ще: Твоего́ Спа́се, сподо́би тридне́внаго воста́ния поклони́тися сия́нию.

Сла́ва, и ны́не, гла́с 8: Дне́сь Влады́ка тва́ри, и Госпо́дь сла́вы, на Кресте́ пригвожда́ется, и в ре́бра пробода́ется, же́лчи и о́цта вкуша́ет, сла́дость церко́вная. венце́м от те́рния облага́ется, покрыва́яй не́бо о́блаки: оде́ждею облачи́тся поруга́ния, и зауша́ется бре́нною руко́ю, руко́ю созда́вый челове́ка: по плеще́ма бие́н быва́ет, одева́яй не́бо о́блаки. Заплева́ния и ра́ны прие́млет, поноше́ния и зауше́ния. И вся́ терпи́т мене́ ра́ди осужде́ннаго, Изба́витель мо́й и Бо́г, да спасе́т ми́р от пре́лести я́ко благоутро́бен.

В Мине́и же оставля́ем, и глаго́лем кано́н свята́го на Повече́рии.

Проки́мен псало́м 67, гла́с 6: Воспо́йте Го́сподеви, по́йте и́мени Его́. Сти́х: Путесотвори́те возше́дшему на за́пады.

Бытия́ чте́ние. [Быт. 9:8–17.]

Рече́ Бо́г Но́еви, и сыно́м его́ с ни́м, глаго́ля: Се́ А́з поставля́ю заве́т Мо́й ва́м, и се́мени ва́шему по ва́с, И вся́кой души́ живу́щей с ва́ми, от пти́ц, и от ско́т, и все́м звере́м земны́м, ели́ка с ва́ми [су́ть] от все́х изше́дших из ковче́га. И поста́влю заве́т Мо́й с ва́ми: и не у́мрет вся́ка пло́ть ктому́ от воды́ пото́пныя, и ктому́ не бу́дет пото́п во́дный, е́же истли́ти всю́ зе́млю. И рече́ Госпо́дь Бо́г Но́еви: сие́ зна́мение заве́та, е́же А́з даю́ между́ Мно́ю и ва́ми, и между́ вся́кою душе́ю живо́ю, я́же е́сть с ва́ми в ро́ды ве́чныя: Дугу́ мою́ полага́ю во о́блаце, и бу́дет в зна́мение заве́та [ве́чнаго] между́ Мно́ю и земле́ю. И бу́дет егда́ наведу́ о́блаки на зе́млю, яви́тся дуга́ Моя́ во о́блаце: И помяну́ заве́т Мо́й, и́же е́сть между́ Мно́ю и ва́ми, и между́ вся́кою душе́ю живу́щею во вся́кой пло́ти, и не бу́дет ктому́ вода́ в пото́п, я́ко потреби́ти вся́ку пло́ть. И бу́дет дуга́ Моя́ во о́блаце: и узрю́ ю́, е́же помяну́ти заве́т ве́чный между́ Мно́ю и земле́ю, и между́ вся́кою душе́ю живу́щею во вся́кой пло́ти, я́же е́сть земли́. И рече́ Бо́г Но́еви: сие́ зна́мение заве́та, его́же положи́х между́ Мно́ю, и между́ вся́кою пло́тию, я́же е́сть на земли́.

Проки́мен, псало́м 68, гла́с 6: Спасе́ние Твое́ Бо́же, да прии́мет мя́. Сти́х: Да у́зрят ни́щии, и возвеселя́тся.

При́тчей чте́ние. [Притч. 12:8–22.]

Уста́ разу́мнаго хвали́ма быва́ют от му́жа: слабосе́рд же поруга́емь быва́ет. Лу́чше му́ж в безче́стии рабо́таяй себе́, не́жели че́сть себе́ обложи́в, и лиша́яйся хле́ба. Пра́ведник ми́лует ду́шы ското́в свои́х: утро́бы же нечести́вых неми́лостивны. Де́лаяй свою́ зе́млю, испо́лнится хле́бов: гоня́щии же су́етная лише́ни ра́зума. и́же е́сть сла́достен в ви́нном пребыва́нии, в свои́х тверды́нях оста́вит безче́стие. Жела́ния нечести́вых зла́, коре́ние же благочести́вых в тве́рдостех. За гре́х усте́н впа́дает в се́ти гре́шник: избега́ет же от ни́х пра́ведник. сматря́яй кро́тко, поми́лован бу́дет: а срета́яй во врате́х, оскорби́т ду́шы. От плодо́в у́ст душа́ му́жа напо́лнится благи́х: воздая́ние же усте́н его́ возда́стся ему́: Путие́ безу́мных пра́ви пред ни́ми: послу́шает сове́тов му́дрый. Безу́мный а́бие испове́сть гре́х сво́й: кры́ет же свое́ безче́стие хи́трый. Явле́нную ве́ру возвеща́ет пра́ведный: свиде́тель же непра́ведных льсти́в. Су́ть, и́же глаго́люще уязвля́ют а́ки мечи́: язы́цы же прему́дрых исцеля́ют. Устне́ и́стинны исправля́ют свиде́тельство: свиде́тель же ско́р язы́к и́мать непра́веден. Ле́сть в се́рдце кую́щаго зла́я: хотя́щии же ми́ра, возвеселя́тся. Ничто́же непра́ведное уго́дно е́сть пра́ведному: нечести́вии же испо́лнятся злы́х. Ме́рзость Го́сподеви устне́ лжи́вы: творя́й же ве́рно прия́тен Ему́.

На стихо́вне самогла́сен, гла́с 3. Два́жды:

Побежда́я мытаря́ прегреше́ньми, не ревну́ю покая́нию: фарисе́ова же не стяжа́в исправле́ния, подража́ю возноше́ние. Но Твоего́ смире́ния превосхожде́нием Христе́ Бо́же, бесо́вское высокому́дрие на Кресте́ низложи́вый пе́рваго у́бо лука́вства, после́дняго же безу́мия отчужди́ мя, обои́х благо́е предложе́ние в души́ мое́й утверди́в, и спаси́ мя.

Му́ченичен: Проро́цы и апо́столи Христо́вы, и му́ченицы, научи́ша пе́ти Тро́ицу Единосу́щную, и просвети́ша язы́ки заблу́ждшыя, и о́бщники а́нгелов сотвори́ша сы́ны челове́ческия.

Сла́ва, и ны́не, самогла́сен, гла́с 5:

Зря́щи Тя́ тва́рь вся́ на Кресте́ на́га ви́сяща, Соде́теля и Зижди́теля все́х, изменя́шеся стра́хом и рыда́ше: со́лнце же све́т омрачи́, и земля́ колеба́шеся, ка́мение же разседа́шеся, и хра́ма све́тлость раздира́шеся, ме́ртвии воста́ша от гробо́в, и а́нгельския си́лы ужасо́шася глаго́люще: о чудесе́! судия́ су́дится, и стра́ждет хотя́ за спасе́ние ми́ра, и обновле́ние.